LA 38 SELMANA DE LES LLETRES ASTURIANES VA CENTRASE NA LLITERATURA ESCRITA POR MUYERES
30/01/2017

Desque les instituciones asturianes asumieron la promoción y protección del asturianu, celébrase cada mes de mayu la Selmana de les Lletres Asturianes como unu de los actos culturales más importantes del añu, tanto pol so calter simbólicu como pola so contribución a la divulgación de la lliteratura asturiana.

La Selmana de les Lletres dedicóse n'ocasiones a escritores particulares y, n'otres, adquirió un calter temáticu, centrándose en xéneros lliterarios como la narrativa, la poesía o'l teatru. Pa esta edición, la númberu 38, la Conseyería d'Educación y Cultura va preparar un programa d'actos que va atender de manera especial a la lliteratura escrita por muyeres.

Esti homenaxe institucional y colectivu a les lletres va llegar a tola sociedá asturiana ente'l 2 y el 9 de mayu con actos de bien diversu calter (espectáculos poético-musicales, llectures públiques, coloquios, certámenes escolares o representaciones teatrales). El gallego-asturianu va cuntar tamién con un actu institucional especial -Homenaxe ás nosas lletras- que va celebrase n'A Caridá (El Franco).

Nel marcu de la Selmana, la Conseyería d'Educación y Cultura entama tamién el Día del Llibru Asturianu, que cada añu avera la lliteratura asturiana a más públicu: en collaboración con más de sesenta llibreríes de la rexón, el 5 de mayu los compradores de llibros n'asturianu o gallego-asturianu van tener un 10 % de descuentu y van recibir como regalu un llibru qu'incluye testos de muyeres escritores dende'l sieglu XVIII hasta anguaño.